Na jolo tikki ro musim panas di negara 4 musim, akka kapal mesin uap lao ma marsolu tu haliang na jonok tu kutub. Mansai ribur ma akka parkarejo mamboan ugasan na lao mamunttari akka balok-balok es na adong di kutub i. Nasida karejo laho mangisi akka kapal uap i dohot balok es, dung marisi godang mulak ma halak i muse tu Eropa dohot tu Amerika. On ma tikki na di dok "industri es kutub" na tikki i adong di abad 19, molo di hata internasional, on ma di dok Ice Trade.
Molo nga ro musim panas, mansai porlu hian do es balok on tarlumobi lao pangkeon ni akka jolma na mora jong. Akka na mora on dang maralang-alang lao mamukka puro na asa boi manuhor es balok i jala molo porlu diimpor nasida do sian kutub marhite akka perusahaan na pinukka na. Jala adong do perusahaan pangaradehon akka parkarejo dohot kapal songon na nidok di na parjolo. Alani i bisnis impor es kutub on mansai lakku jala ribur do dir Amerika dohot di Eropa.
Revolusi Industri 1.0 marhite mesin uap mambaen sektor on godang manjalahi. Dung adong kapal mesin uap mansai mura ma mamboan es na sian kutub tu inganan na di Eropa manang Amerika tarlumobi lao tu haporluan di musim panas. Molo parkiraan ni akka jolma tikki i, bisnis na martiga-tiga es balok on sampe 28 juta dollar do tikki i, molo diparetongkan saonari hira-hira 700 juta dollar ma i. Godang ni hepeng jala ribur ni bisnis on boi do paradehon karejo tu 100.000 par karejo. Di akka bangso Nordik tarsongon Norwegia, ekspor es ktub nasida sampe 1 juta ton dibagasan sataon.
Bisnis na martiga-tiga es kutub on (mambuat dohot mangangkut) martahan do sampe 100 taon, akka hepeng na mardalan sian bisnis on marjuta jala akka parkarejo pe godang do mangulahon on. Alani i boi ma di dok tikki i di akka bangso i tikki i martiga-tiga es kutub mansai bisnis na beteng do.
Dung sadia leleng ro ma Revolusi Industri 2.0 na pataridahon hebetengon na marhite listrik (arus). Di dok di periode on Elektrifikasi. Taringot listrik on mansai sobu jala karas do bikkas na mambaen perekonomian ni manisia gabe marimbar sian songon na jolo. Dung adong listrik on, dipukka akka pemodal ma pabrik-pabrik es. Dungi adong ma refrigerator na mambaen bisnis maritiga-tiga es na ro sian kutub na tinaringoti parjolo dang dihantushon akka jolma be. Alana molo nga dipukka pabrik es jala adong refrigerator na, akka na mora boi do puna es dang pola sai ikkon lao tu kutub. Proses na efisien jala praktis, dang pola porlu kapal uap manang akka parkarejo sitallik es. Dung adong listrik, es na boi dohonon sada ugasan ni namora gabe songon ugasan na boi dituhor sude halak.
Dung adong pabrik es on, tarida ma aha na di dok na disrupsi tarlumobi di akka pebisnis es na di kutub. Mansai longang do nasida ala godang kapal uap nasida dang mardalan be, godang akka parkarejo ima akka sitallik dohot sihallung es gabe dang karejo. Boasa songon i? Ala dang sude sitallik dohot sihallung es sian kutub i malo lao mengoperasihon masin pencetak es na adong di pabrik, jala sada nai molo pabrik es on dang pola godang akka parejo na molo diimbarhon dohot bisnis es kutub. Efisiensi timbo, alai inganan lao karejo gabe otik nama. Dang pola 20 taon, godang ma pabrik es di portibi on. Di masa on ma ditinggalhon jolma secara total bisnis sitallik dohot sihallung es sian kutub.
Alani i gabe ro ma sungkun-sungkun, Ai dung ro industri 2.0 akka manisia perkarejo gabe dang karejo do sude?
Alus na daong.
Dung mago bisnis sitallik dohot sihallung es sian kutub i, arga ni es gabe mura do jala dung godang pabrik es, mar roan ma muse industri na asing di pudian ni ari. Industri rumah makan, industri es krim, industri parubatan manang farmasi, jala industri pardekkean dohot akka industri na asing mar roan ma muse. Alani pabrik es on, godang ma sektor industri gabe beteng. Tar songon industri rumah makan manang restoran, gabe adong jala godang parkarejona. Industri bahan baku makanan gabe godang dipukka akka pemodal. Jala boi dohonon, par ro ni industri 2.0 marhite listrik on toho do pamatehon bisnis na jolo alai tong ma gabe parohon industri na imbaru muse na laho gabe pangunsandean ni jolma lao karejo.
Jadi boi dohonon lapangan karejo dang mago, holan meret do gabe tu sektor na asing.
Dungi ro ma Revolusi Industri 3.0 na beteng marihite komputerisasi. Taon 1970-an kulkas-kulkas na ta ida di jabu saonari dipatandahon ma tu natorop. Molo na jolo jolma manuhor es ikkon tu pabrik do, di taon 1970-an on adong ma pabrik na boi mambaen kulkas lao dipakke tu akka jabu. Alani i gabe godang ma tutup akka pabrik es jala godang ma lapangan karejo moru.
Kulkas na di jabu on praktis do jala om mura do biaya operasional na molo diimbarhon biaya operasional pabrik es. Pabrik-pabrik es on nanget-nanget tutup ma tikki i holan alani pabrik kulkas na di masa i na hurang lobi 20-an di liat portibi on. Ima na boi hita tanda marhite merek Toshiba, General Electric, Sharp, Samsung dohot akka marek na asing.
Jadi alani kulkas on moru ma pabrik es jala godang ma jolma dang karejo be.
Ale mulak muse tu sungkun-sungkun on, Revolusi Industri 3.0 on mambaen jolma manisia gabe dang karejo do?
Alus na daong.
Dung adong pabrik-pabrik na mambaen kulkas na pamatehon pabrik es alani Revolusi Industri 3.0, gabe dipukka akka pemodal ma muse pabrik na asing. Antar songon pabrik soft drink manang minuman ringan, molo di hita on tarsongon Badak namang Coca Cola ma i. Bisnis Coca Cola dohot Pepsi lakku hian jala mammukka pabrik ma nasida. Dibaen ma marmaccam jenis ni minuman na mar merek Pepsi manang Coca Cola. Alani godang ni pabrik na dipukka gabe adong ma lapangan karejo na baru di pabrik i mulai sian parkarejo di pabrik i sahat tu supir truk na manaruhon produk soft drink i tu akka luat na asing. Ni sektor na asing muse adong ma tubu industri fas food, industri retail tar songon super market manang mini market.
Boi dohonon kulkas on gabe simbol do on na pamatehon sada lapangan karejo na jolo ale patubuhan lapangan karejo na asing.
Jadi marhite on boi ma dohonon sude perubahan na diboan Revolusi Industri mulai sian 1.0 sahat tu sadari on na tatanda 4.0 marpadan na balga do do tu sada hata ima perubahan. Jala molo ni ranapan daba marhite hamajuan ni teknologi saonari, olo do annon dang adong be supir truk na laho manaruhon akka barang-barang ala diganti gabe self- driving car, marhite i gabe tubu ma muse annon industri na asing.
Ni enet sian na sinurat ni Wirawan Winarto