Godang do angka goar ni si sda-sada ugasan, inganan, manang ajang marbingkas sian tompa, ogungna, rupana, manang leak na. Di Dolok Sanggul, Kabupaten Humbang Hasundutan adong do sada dalan na margoar Dalan Siliwangi. Tardok do on sada dalan na balga/ protokol. Sian dalan on boi i do iba marlao ro tu Medan marhite sian dalan Sidikalang. Di dalan on tagi do dilaosi molo adong angka ulaon manang pawai na balga tarsongon HUT RI manang HUT Humbahas.
Dalan Siliwangi tagi do ditanda jolma alani sada dalan na gabe parsimpangan manang molo halak Dolok Sanggul mandok " Sirpang Opat " ( Dalan Merdeka, Dalan Sisingamangaraja, Dalan Lektol. G.A. Manullang, dohot Dalan Siliwangi)
Molo ni rimangan jala ni sungkun " Boasa adong Dalan Siliwangi di Dolok Sanggul?' mansai tabo no molo ni taringotan. Hata " Siliwangi" dang adong ni ida jala ni dapot sian di hata Batak Toba tarlumobi ma di Dolok Sanggul, tung so adong do na hinan hata "Siliwangi", jadi sian dia do hata Siliwangi on asa gabe adong gabe sada goar ni dalan di Dolok Sanggul? On ma alusna.
Tingki masa pambarontakan PRRI Permesta di Indonesia on, adong do di Sumatera Utara pemberontakan on. Dewan Gajah na dikepalai Kolonel Maludin Simbolon ( Kol. Simbolan) mangalo ma tu pusat. Kol. Simbolon na gabe ketua Dewan Gajah mansai marsak situtu alani mardingkan do pusat (Jakarta) tu angka luat na asing. Godang do angka SDA dohot tuhor na holan mambangun ugasan dohot pamarenta di Jakarta alai di luat na asing mansai porsuk do parngoluan . Alani i mangalo ma Kol. Simbolon tu pamarenta. Mangida naung songon i Kol. Simbolon, tarrimas ma Presiden Soekarno, di patuat ma Kol. Simbolon sian Komandan Kodam I Bukit Barisan, diganti ma gabe Djamin Ginting na gabe ketua ni Kodam I BB on (wakil ni Kol. Simbolon hian do ibana). Dung diganti Kol. Simbolon di dok ma ibana " pemberontak" jala diparenta Soekarno ma si Djamin Ginting asa manangkup jala mamorangi angka "pambarontak"
Tu joloan ni ari alani sobu ni porang i, tarsosak ma angka "pambarontak" tu liat-liat tombak na adong di Humbang dohot Dairi. Sahat ma tong tarsosak "pambarontak" tu Dolok Sanggul ima tu huta Matiti dohot angka tombak na liat di si. Alai talu ma " pambarontak" di porang i mangalo tentara pusat. Di dok Djamin Ginting do tu pamarenta asa di urupi tentara pusat di Dolok Sanggul asa boi mangalo "pambarontak". Jadi diparenta ma tentara sian Kodam III Siliwangi na di Jawa Barat, Bandung, asa ro mangurupi tentara pusat na di Dolok Sanggul i. Dung sahat tentara pusat i di Dolok Sanggul di baen ma markas ni tentara i di Jalan Siliwangi saonari jala hea do porang kota di Dalan Siliwangi on songon na boi taida di film " Tiga Nafas Likas" .
Dung salpu porang i , mambuat roha ma pamarenta tu angka natorop di Humbang Hasundutan. Di baen tentara pusat dohot tentara Siliwangi ma dalan tu Huta Sigambo-gambo nueng jala dipatingkos dalan tu Matiti.
Taon na salpu adong do film " Tiga Nafas Likas " na mambuat syuting di Dolok Sanggul. Songon na taboto film i taringot tu ngolu ni Djamin Ginting dohot Likas, jala di Dolok Sanggul toho do adong tingki i porang na alani i ma di baen syuting nadi si. Molo lao idaon muna behind the scene na on ma ibana.
Losmen Sabar ima Losmen na pas di pinggir Dalan Siliwangi
Syuting na on di Dalan Melanthon Siregar na pas di Pinggor ni Dalan Siliwangi
Jadi i ma taringot tu sian dia ma bingkas na asa adong goar ni Dalan Siliwangi di Dolok Sanggul, Kabupaten Humbahas. Marhite sia i, boi ma hita marsiajar sian angka naung salpu. Horas